ਕਪੂਰਥਲਾ (ਗੌਰਵ ਮੜੀਆ ) ਦਿਵਯ ਜਯੋਤੀ ਜਾਗ੍ਰਿਤੀ ਸੰਸਥਾਨ ਵਲੋਂ ਰਾਮਵਾੜਾ ਮੰਦਿਰ ਰਈਆ ਵਿਖੇ ਤਿੰਨ ਰੋਜ਼ਾ ਸੁੰਦਰ ਕਾਂਡ ਕਥਾ ਦਾ ਆਯੋਜਨ ਕੀਤਾ ਗਿਆ।ਜਿਸ ਦੇ ਦੂਜੇ ਦਿਨ ਸਰਵ ਸ਼੍ਰੀ ਆਸ਼ੂਤੋਸ਼ ਮਹਾਰਾਜ ਜੀ ਦੀ ਸਾਧਵੀ ਗਰਿਮਾ ਭਾਰਤੀ ਜੀ ਨੇ ਕਥਾ ਦਾ ਵਾਚਨ ਕੀਤਾ। ਰਾਮਚਰਿਤ ਮਾਨਸ ਦੇ ਆਧਾਰ ‘ਤੇ ਹਨੂੰਮਾਨ ਜੀ ਦੀ ਸ਼ਖਸੀਅਤ ਦਾ ਵਰਣਨ ਕਰਦੇ ਹੋਏ ਸਾਧਵੀ ਜੀ ਨੇ ਦੱਸਿਆ ਕਿ ਹਨੂੰਮਾਨ ਜੀ ਸਾਡੇ ਸਾਰਿਆਂ ਲਈ ਪ੍ਰੇਰਣਾ ਸਰੋਤ ਹਨ, ਹਨੂੰਮਾਨ ਜੀ ਨੇ ਹਰ ਪ੍ਰਸਥਿਤੀ ਵਿਚੋਂ ਲੰਘਦੇ ਹੋਏ ਆਪਣੇ ਲਕਸ਼ ਨੂੰ ਹਾਸਲ ਕੀਤਾ।.
ਸਾਧਵੀ ਜੀ ਨੇ ਅੱਗੇ ਦੱਸਿਆ ਗੋਸਵਾਮੀ ਤੁਲਸੀਦਾਸ ਜੀ ਦੱਸਦੇ ਹਨ ਕਿ ਇੱਥੇ ਹਨੂੰਮਾਨ ਜੀ ਇੱਕ ਸੰਤ ਦਾ ਪ੍ਰਤੀਕ ਹਨ, ਅਤੇ ਲੰਕਿਨੀ ਆਤਮਾ ਦਾ ਪ੍ਰਤੀਕ ਹੈ। ਹਨੂੰਮਾਨ ਜੀ ਦਾ ਪ੍ਰਹਾਰ ਕਰਨਾ ਭਾਵ ਸਤਿਸੰਗ ਰੂਪੀ ਵਿਚਾਰਾਂ ਦਾ ਮਨ ਰੂਪੀ ਬੁਰੇ ਵਿਕਾਰਾਂ ਤੇ ਪ੍ਰਹਾਰ ਹੈ।
ਸਾਧਵੀ ਜੀ ਨੇ ਦੱਸਿਆ ਕਿ ਜਦੋਂ ਜਦੋਂ ਵੀ ਮਾਨਵ ਜਾਤੀ ਵਿਕਾਰਾਂ ਨਾਲ ਗ੍ਰਸਤ ਹੁੰਦੀ ਹੈ, ਤਾਂ ਉਸ ਸਮੇ ਦੇ ਪੂਰਣ ਸੰਤ ਅਤੇ ਗੁਰੂ ਮਨੁੱਖ ਜਾਤੀ ਨੂੰ ਸਿੱਧੇ ਰਾਹੇ ਪਾਉਣ ਲਈ ਉਸ ਨੂੰ ਬ੍ਰਹਮ ਗਿਆਨ ਪ੍ਰਦਾਨ ਕਰਦੇ ਹਨ। ਬ੍ਰਹਮਾ ਗਿਆਨ ਦੇ ਦੁਆਰਾ ਜੀਵ ਆਤਮਾ ਆਪਣੇ ਘਟ ਦੇ ਅੰਦਰ ਪ੍ਰਮਾਤਮਾ ਦੇ ਦਰਸ਼ਨ ਕਰਕੇ ਉਸ ਪਰਮਾਤਮਾ ਦੀ ਭਗਤੀ ਵੱਲ ਵਧਦੀ ਹੈ। ਸਾਡੇ ਗ੍ਰੰਥ ਕਹਿੰਦੇ ਹਨ ਕਿ ਪੂਰਨ ਗੁਰੂ ਦੇ ਗਿਆਨ ਤੋਂ ਬਿਨਾਂ ਵਿਕਾਰਾਂ ਤੋਂ ਮੁਕਤੀ ਸੰਭਵ ਨਹੀਂ ਹੈ। ਹਨੂੰਮਾਨ ਜੀ ਦੇ ਰੂਪ ਵਿੱਚ ਇੱਕ ਸੰਤ ਦੇ ਆਉਣ ਨਾਲ ਲੰਕਿਨੀ ਦਾ ਜੀਵਨ ਵੀ ਬਦਲ ਗਿਆ।
ਇਸ ਲਈ ਜੀਵਨ ਵਿਚ ਪੂਰਣ ਗੁਰੂ ਦਾ ਹੋਣਾ ਸਭ ਦੇ ਲਈ ਬਹੁਤ ਜਰੂਰੀ ਹੈ। ਕਥਾ ਵਿੱਚ ਵਿਸ਼ੇਸ਼ ਤੌਰ ‘ਤੇ ਸ਼੍ਰੀ ਹੇਮਦੀਪ ਮੰਨਣ ਜੀ (ਆਰ.ਐੱਸ.ਐੱਸ. ਮੈਂਬਰ), ਸ਼੍ਰੀ ਰਾਜੇਸ਼ ਟਾਂਗਰੀ (ਪ੍ਰਧਾਨ ਰਈਆ ਗ੍ਰਾਮੀਣ, ਭਾਜਪਾ), ਸ਼੍ਰੀ ਸਵਤੰਤਰ ਕੁਮਾਰ ਜੀ (ਰਾਮਵਾੜਾ ਮੰਦਰ ਕਮੇਟੀ ਮੈਂਬਰ),ਇੰਦਰ ਮੋਹਨ ਜੀ (ਬਾਵਾ ਲਾਲ ਦਿਆਲ ਮੰਦਰ ਕਮੇਟੀ ਮੈਂਬਰ) ਪਹੁੰਚੇ। ਕਥਾ ਵਿਚ ਆਈਆਂ ਸੰਗਤਾਂ ਨੇ ਕਥਾ ਦੇ ਨਾਲ-ਨਾਲ ਭਜਨਾਂ ਦਾ ਪੂਰਾ ਆਨੰਦ ਮਾਣਿਆ।
